Að vera einn í heiminum..

Það er hægt að vera einn í heiminum af ýmsum ástæðum. Sumir eru einfaldlega svo gott sem einir í heiminum vegna þess að þeir eiga engan að og það er án efa sorglegasta afbrigði þess að vera einn í heiminum. Aðrir eru einir í heiminum vegna þess að þeir halda að þeir séu það og koma ekki auga á allt fólkið sem styður við bak þeirra.

Þriðja tegund þeirra sem eru einir í heiminum fer í taugarnar á mér. Það er flokkur þeirra sem eru einir í heiminum í þeim skilningi að allir aðrir mega víkja og þeirra þörfum skal mætt nákvæmlega þegar þeim hentar, burtséð frá því hvernig það gæti hentað þeim sem í kringum þá eru. Flokki þrjú tilheyrir semsagt fólkið sem kýs það að vera eitt í heiminum.

Fólk í flokki þrjú eru brjálæðingarnir á innkaupakerrunum í bónus sem valda því að maður fer haltrandi þaðan út. Fólk í flokki þrjú gefur engan séns í umferðinni, á afar erfitt með að bíða í röðum og hefur aldrei komist upp á lag með að nota orð líkt og ,,afsakið" eða ,,fyrirgefðu". Fólk í flokki þrjú er ekki fólk að mínu skapi.

Nú er sennilega illa séð að ég skuli skipta fólki svona upp í flokka en það er alltaf val um að vera á gráu svæði.. grátt getur verið gott.

Já, mikið er kellan djúpvitur í kvöld. Þessi pæling bara poppaði upp í hausinn á mér þegar ég fékk heilt borð í kjöltuna frá konu sem hafði hreiðrað um sig í flokki þrjú og sennilega verið þar lengi.

Góðar stundir
Glóda