Kaffi latte-gallabuxur

Ég er búin að hafa það gott í sveitinni með feðgunum mínum. Á milli jóla og nýárs skruppum við samt aðeins í bæinn og sinntum erindum og fórum í afmæli til sætu ömmu Guggu.

Við skelltum okkur á kaffihús í örlagaríkri Kringluferð. Í stuttu máli sagt endaði risastór Kaffi latte í kjöltunni á mér svo ég varð að tipla niður í Zöru á hæðinni fyrir neðan og versla mér buxur í snarhasti. Ég var ansi lúpuleg þar sem ég gekk inn í búðina, rennandi blaut niður að hnjám og reyndi að skýla stærstu slettunum með töskunni minni. Eftir að hafa snarað mér í buxur, þurfti ég að rölta fram og segja afgreiðslustúlkunni þessa mjög svo absúrd sögu mína.

Það fór svo að ég þurfti að hitta afgreiðslustúlkuna inni í mátunarklefa (ekkert klúrt sko) þar sem hún fjarlægði þjófavörnina af mér. Svo klippti hún miðann af buxunum þar sem ég stóð fremst í röðinni frammi í búð. Það voru ansi mörg augu sem hvíldu á mér á þeim tímapunkti, skal ég segja ykkur. Enda kannski ekkert svakalega skrýtið svosem..

Annars er allt við það sama, ofát og leti og afslöppun. Við erum komin heim í kotið. Voða gott að koma heim þó það hafi verið gott að vera í sveitinni líka.