Þá er dagur að kveldi kominn. Já æ ég ætla nú ekkert að fara að blogga eins og ég sé komin á tíræðisaldurinn, bara langaði svo að skrifa þetta svona í upphafi tilgangslausrar færslu. Fyrir nú utan það að ég held að fáar konur á tíræðisaldri haldi uppi bloggsíðu. En það er nú annað mál.

Lísa systir kom færandi hendi hingað í kvöld, hún var að koma úr Ameríkuflugi og verslaði handa litla frænda sínum eins og hennar er von og vísa. Sá stutti var auðvitað hæst ánægður með þetta og eyddi lunganum úr kvöldinu í það að spila fiskaspil við færnku sína og svindla all hressilega líka. Nauðsynlegt að læra að svindla þegar maður er orðinn þriggja ára...

Ég er búin að vera nokkuð löt og drusluleg undanfarna daga. Enda svosem kannski erfiðara að hugsa þegar heilinn er uppfullur af hori. Ég ætla allavega að skýla mér bara á bak við það í bili, takk fyrir.

En af því að ég er löt þá ætla ég að slá botninn í þessa færslu og leyfa mér að segja það að ég nenni ekki að skrifa meira. Svo er ég líka orðin þreytt en nenni ekki að fara að sofa. Góð stemning á heimilinu í kvöld.