"Neyðin kennir naktri konu að spinna - kannski átti þessi ekkert nema sængurver, nál og tvinna!"

Við Anton höfum svolítið verið að útrétta um helgina, losa okkur við óþarfa drasl og undirbúa heimilið og okkur sjálf fyrir komu litlu breddunnar. Um helgina hafa eldri konur í spássitúr verið í miklum meirihluta í borginni, enda svo margir sem fóru út úr bænum að tjalda og djamma og hafa gaman. Þar á meðal sáum við gamla konu í sængurveradragt. Já án gríns- hún hefur pottþétt saumað sér dragt úr gamla sængurverinu sínu og ekki einu sinni haft fyrir því að strauja það né þvo áður. Mínum elskulega Antoni varð þá svona skemmtilega að orði - mér finnst þetta eiginlega bara óborganlega fyndið og er enn að brosa að þessum hagyrðingi sem ég giftist.

In other news þá er bara ekkert að gerast. Við erum að leggja lokahönd á það sem þarf að gera en erum enn ekki alveg tilbúin með allt. Það eru 8 dagar í settan dag, ungbarnafötin flest orðin þvegin og komin ofan í skúffu, vagninn enn með skökku hjólastelli niðri í geymslu og skiptiborðið enn í búðinni og svona- ekki allt tilbúið en það er svosem ekkert hundrað í hættunni.

Ég er enn í hálfgerðu stofufangelsi, þar sem ég má ekkert vera að vesenast ein úti ef vatnið skyldi fara því litla bredda er enn óskorðuð og gæti orðið fyrir súrefnisskorti ef naflastrengurinn fer á flakk við vatnsflauminn. Nú er farið að ræða gangsetningu þar sem fæðingarlæknir þarf að hjálpa þrjóskupúkanum að komast ofan í grindina í fæðingunni. En svo gæti hún allt eins snúið sér núna og skorðað sig og það væri þá bara gott mál.

En þá get ég líka sagt ykkur að hún kemur ekki strax. Ég er nefnilega eins og fíll og ef það tíðkaðist ekki að setja konur í gang eftir x langan tíma hefði ég líklega gengið með Ísak í 21 mánuð að hætti fíla og virðist ætla að reyna það aftur núna.

Jámm semsagt allt með kyrrum kjörum. Ekkert að gerast, allir pollrólegir.