Einvera og annað

Jæja já, þá er ég útskrifaður leikskólakennari og við búin að halda upp á það og fimm ára afmæli drengsins með ágætum. Veislan var svaka fín, athöfnin hátíðleg og ekki spillti veðrið fyrir. Við Ísak fengum mjög góðar gjafir og viljum nota tækifærið og þakka kærlega fyrir okkur! Ísak er mikið búinn að leika með dótið og ég hef spókað mig um með nýtt skart upp á hvern einasta dag og gluggað í áhugasömum bókum svo fátt eitt sé nefnt.

Á sunnudeginum eftir útskriftina fékk Ísak svo strákavini sína hingað heim í afmæli. Það gekk alveg ágætlega en ég þakka samt fyrir að þetta skuli bara vera einu sinni á ári (og bráðum tvisvar..úfff). Hér gekk á ýmsu en hápunkturinn var líklega þegar þrír drengir rifust hástöfum um það hver þeirra prumpaði mest. Þá var auðvitað æskilegast að eiga vinninginn í þeim efnum og enginn var til í að láta í minni pokann.

Hér gengur lífið annars bara sinn vanagang, Ísak er alltaf jafn ljúfur og þægilegur, ég er eiginlega alveg hissa á því hvað hann er góður, svona miðað við hvað ég var og er sjálf mikil bredda. Enda vill pabbi hans meina að hann eigi heiðurinn að þessum góðu genum.

Bumbudísin dafnar aldeilis vel, við vorum send í aukasónar um daginn eftir eina mæðraskoðunina þar sem hún er í óstabílli legu og því alltaf að skipta um stellingu. Ef vatnið fer núna þarf ég semsagt að leggjast og hringja á sjúkrabíl. Sé það ekki alveg fyrir mér í Kringlunni eða eitthvað svo mig langar helst ekki að fara neitt ein! Sú stutta mældist 12 merkur á fimmtudaginn og áætluð fæðingarþyngd er 16 merkur ef ég geng ekki framyfir. Annars gæti hún orðið aðeins stærri. Úff..pant ekki ganga framyfir! Ísak var bara tæpar 14 merkur, svo fín stærð ;) Annars eru akkúrat 3 vikur í settan dag í dag, þetta líður hratt.

Ég er ein heima eins og flesta aðra daga og er að dútla við að þvo bleik lítil föt ( Já það var tékkað aftur á kyninu í aukasónarnum og þar var nokkuð greinilegt að ekkert tippi er á þessu barni). Ég nenni ekki einu sinni út því ég hef engan að "leika við". Þá finnst mér betra að draga bara fyrir gluggana og útiloka sólina á meðan ég þvæ föt og geng frá. Þá missi ég líka bara vatnið í skjóli myrkurs ef það gerist á annað borð, og enginn þarf að sjá mig liggja rennblauta í Kringlunni og gera sér það í hugarlund að ég hafi migið á mig.

Eigið góðan dag !