Hið smáa :)

Ég er komin yfir kreppusjokkið og allan pirringinn, eða svo gott sem. Litla títla sefur úti í rigningunni og stóri títli er í leikskólanum. Hann hefur hlakkað til föstudagsins alla vikuna því það er slátur í matinn hjá þeim í dag. Dásamlegt að vera 5 ára og geta glaðst yfir svona litlum hlutum:) elsku kúturinn minn.

Ég er að nota tímann til að snurfusa aðeins hérna og rembast við að finna húsmóðurgenin en það er ansi djúpt á þeim verð ég að viðurkenna. Veit fátt leiðinlegra en að laga til. Samt elska ég þegar það er allt orðið hreint og strokið. Nýt semsagt afrakstursins en ekki vinnslunnar. Jamm ég er farin að röfla hérna, alveg greinilegt að ég hef engan að tala við. Enda er ég búin að hanga í símanum síðan títla fór út í vagn.

Hey og vitiði hvað? Hún hló í fyrsta skipti upphátt áðan! Ég var að fíflast og kjánast í henni og henni fannst mamma sín svo skemmtileg að hún splæsti krúttlegasta hlátri í heimi á mig og bjargaði þar með þessum rigningardegi :)

Játs það eru ekki bara 5 ára krúttin sem geta glaðst yfir hinu smáa :)

Hafið það gott, krúttin mín
Eygló peygló