Já ég er hér enn :)

Gleðilegt árið, góðir hálsar. Vonandi höfðu allir það gott um áramótin !

Um daginn fór ég á snatterí með Lísu systur, sem er svosem ekkert í frásögur færandi. Nema hvað að vegna einstakrar þarfar minnar fyrir kók og appelsínuklaka, fórum við í 10-11 á leiðinni heim. Í efstu steinsteyptu tröppunni segi ég þessa fallegu setningu : "hey á ég að segja þér svolítið nördalegt?". Ég var ekki fyrr búin að sleppa orðinu en ég steig á hálkublett og húrraði niður tröppurnar með góðgætið mitt í eftirdragi. Þegar ég var lent,hafði ég að sjálfsögðu miklar áhyggjur af mínu dýrmæta coka cola light semm hafði flogið með mér niður tröppurnar án þess að hafa haft neitt um það að segja. En fyrst að kókið slapp og appelsínuklakinn minn líka, gat ég farið að huga að eigin líkama. Marblettir hér og þar og ég er bara í heilu lagi.

En ég get alveg sagt ykkur það að ég er ekki á leiðinni í 10-11 í bráð!!!! Lísa hafði reyndar á orði að á eftir fleygu setningunni hefði átt að koma : "better yet, I´ll show you!!!". Enda var þetta nördalegt í meiralagi og hrikalega fyndið.

Við (lesist: mamma og pabbi) erum búin að kaupa parket á íbúðina!!! Og málningu líka. Svo nú ætla ég að kyssa eiturgrænu stofuveggina bless og sömuleiðis þetta miður fallega teppi. Þetta gæti meira að segja orðið til þess að ég get boðið fólki í heimsókn :). Það verður ráðist í þetta á næstu dögum :). Að vísu langar mig líka að senda eldhúsinnréttingarhurðarnar í sprautulökkun og mála yfir ísbláa eldhúsveggina. Aldrei að vita hvað manni dettur í hug, ef að skólinn drekkir mér ekki alveg.

Einkunnirnar eru allar í höfn og ég get verið sátt. Náði öllu og fékk bara fínar einkunnir :)

Í gær var Singstar partý með mínum elskulega bekk og það var bara rosalega gaman, ég vaknaði meira að segja smá hás (sem segir kannski mikið um sönghæfileika mína!). Við enduðum niðri í bæ, og ég í dúnúlpu og alles!! Ég ætlaði sko EKKI niður í bæ í þessu veðri. Svo allt í einu varð rjómablíða og vel bæjarfært. En iss piss, dúnúlpa á djamminu blívar..enda var ég sú eina sem skalf ekki og nötraði:)

Hálfgerð ritstífla í gangi núna, svo ég held ég slái botninn í þetta blogg að þessu sinni.