Ojbara

Ég er komin með svo mikið ullabjakk á þessari íbúð. Ömurlegt að ganga á teppi sem maður veit að öll heimsins efni hafa fallið í. Við skötuhjúin gerðum lauslega úttekt á því sem hefur dottið í gólfið bara hjá okkur- og Guð má vita hvað hafði dottið í það hjá þessum tveimur familíum sem trömpuðu á teppinu á undan okkur! En nú stöndum við bara frammi fyrir því að hafa valið brúðkaup og skólagöngu fram yfir þetta viðbjóðslega teppi og því ekki til króna með gati til að henda því út og kaupa annað gólfefni. Að maður tali ekki um tíma-og sinnuleysi af verstu gerð. Mig alveg dreymir um fallega íbúð þar sem allt er okkar og dettur ekki í sundur þegar maður kemur við það..ohh hvað það væri næs:)

Svo skánaði ekki ástandið þegar ég sá að "MTV Cribs" var í sjónvarpinu og Missy Eliott var að sýna höllina sína. Bara skrilljón glansandi skópör, risa baðherbergi..risa allt. Og glansandi porsche og Hummer og aðrar drossíur í innkeyrslunni. Voðalega er þessu misskipt. En ég kann auðvitað ekki að syngja né rappa..þar liggur kannski stærsti vandinn ;)
En svo horfir örugglega fólkið sem býr í pappakassa öfundaraugum á mig fyrir það að fá að búa þar sem ég bý.

En hvað sem því líður,þá bara missti ég mig alveg óvart og reif upp teppið á ganginum eins og óð manneskja. Gólfið undir er litlu skárra og plan mitt um að þrífa gólfið og lakka yfir það, datt eiginlega uppfyrir. Svo er kannski ekkert sniðugt að vera að þessu viku fyrir brúðkaup..veit ekki. Svo ég lagði bara teppið pent yfir ganginn aftur eins og ekkert hefði ískorist..nema það er auðvitað laust á gólfinu núna!

Hver býður sig fram í að koma og redda íbúðinni ? ;) djók

Vá..ég er viss um að lesendur (lesandi) hafa sótt sér popp og kók við aflestur þessa skemmtilega teppabloggs. Hvað er meira spennandi en teppi sem hefur sankað að sér öllum frumefnum jarðar? :)